തിരുവനന്തപുരം: സംസ്ഥാനത്തെ 38 തദ്ദേശ സ്വയംഭരണ വാർഡുകളിലെ ഉപതെരഞ്ഞെടുപ്പിനായി തയ്യാറാക്കുന്ന വോട്ടർ പട്ടികയിൽ പേര് ചേർക്കാൻ നാളെ (ഓഗസ്റ്റ് അഞ്ച്) കൂടി മാത്രം അവസരം. 2026 ജനുവരി ഒന്നിനോ അതിന് മുൻപോ 18 വയസ്സ് തികഞ്ഞവർക്ക് പട്ടികയിൽ പേര് ചേർക്കാവുന്നതാണ്.
സംസ്ഥാന തെരഞ്ഞെടുപ്പ് കമ്മീഷന്റെ ഔദ്യോഗിക വെബ്സൈറ്റ് വഴി ഓൺലൈനായി അപേക്ഷകൾ സമർപ്പിക്കാം.
പ്രധാന വിവരങ്ങൾ:
അന്തിമ പട്ടിക: വോട്ടർമാരുടെ അന്തിമ പട്ടിക ഓഗസ്റ്റ് 19-ന് പ്രസിദ്ധീകരിക്കും.
കരട് പട്ടിക: ജൂലൈ 21-ന് പ്രസിദ്ധീകരിച്ച കരട് പട്ടികയിൽ ആകെ 3,06,947 വോട്ടർമാരാണുള്ളത്. ഇതിൽ 1,57,616 സ്ത്രീകളും 1,49,327 പുരുഷന്മാരും നാല് ട്രാൻസ്ജെൻഡർ വോട്ടർമാരുമുണ്ട്.
പരിശോധന: കരട് വോട്ടർ പട്ടിക അതത് തദ്ദേശ സ്വയംഭരണ സ്ഥാപനങ്ങളിലും താലൂക്ക്, വില്ലേജ് ഓഫീസുകളിലും പരിശോധിക്കാൻ സൗകര്യമുണ്ട്.
ഉപതെരഞ്ഞെടുപ്പ് നടക്കുന്ന വാർഡുകൾ:
കൊല്ലം, ആലപ്പുഴ ഒഴികെ 12 ജില്ലകളിലായി 38 വാർഡുകളിലാണ് ഉപതെരഞ്ഞെടുപ്പ് നടക്കുന്നത്. ഇതിനായി 385 പോളിങ് സ്റ്റേഷനുകൾ സജ്ജീകരിക്കും.
കോർപറേഷൻ വാർഡുകൾ – 2 (എറണാകുളം, കോഴിക്കോട്)
മുനിസിപ്പാലിറ്റി വാർഡുകൾ – 3 (തൃശൂർ, പാലക്കാട്, കണ്ണൂർ)
ജില്ലാ പഞ്ചായത്ത് വാർഡുകൾ – 3 (തിരുവനന്തപുരം, കോട്ടയം, പാലക്കാട്)
ബ്ലോക്ക് പഞ്ചായത്ത് വാർഡുകൾ – 7
ഗ്രാമപഞ്ചായത്ത് വാർഡുകൾ – 23
വോട്ടവകാശം ഉറപ്പാക്കാൻ അർഹരായ മുഴുവൻ പേരും ഈ അവസരം വിനിയോഗിക്കണമെന്ന് സംസ്ഥാന തെരഞ്ഞെടുപ്പ് കമ്മീഷൻ അറിയിച്ചു.
