കോഴിക്കോട്: മദ്യപിച്ച് അപകടകരമായി വാഹനം ഓടിച്ചതിന് പ്രമുഖ യൂട്യൂബർ അശ്വന്ത് കോക്കിനെതിരെ നടക്കാവ് പൊലീസ് കേസെടുത്തു. മനുഷ്യജീവന് അപായം ഉണ്ടാകുന്ന രീതിയിൽ വാഹനം ഓടിക്കൽ, മദ്യപിച്ച് വാഹനം ഓടിക്കൽ തുടങ്ങിയ ജാമ്യമില്ലാ വകുപ്പുകൾ ഉൾപ്പെടെയാണ് ഇയാൾക്കെതിരെ കേസെടുത്തിരിക്കുന്നത്. ഇന്നലെ വൈകുന്നേരം അരയടത്തുപാലത്തുനിന്ന് എരഞ്ഞിപ്പാലം ഭാഗത്തേക്ക് അശ്വന്ത് കോക്ക് ഓടിച്ചുവന്ന ഥാർ (Thar) ജീപ്പ് റോഡിലുണ്ടായിരുന്ന മറ്റ് വാഹനങ്ങളിൽ ഇടിക്കുകയായിരുന്നു. തുടർന്ന് നാട്ടുകാരുടെ നേതൃത്വത്തിൽ തടഞ്ഞുവെച്ച ഇയാളെ പൊലീസെത്തി കസ്റ്റഡിയിലെടുക്കുകയായിരുന്നു. സംഭവത്തിൽ പൊലീസ് കൂടുതൽ അന്വേഷണം നടത്തിവരികയാണ്.

ദേശീയപാതയിൽചൂർണിക്കര കമ്പനിപ്പടിയിൽ ഓട്ടത്തിനിടെ കണ്ടെയ്‌നർ ലോറിക്കു തീപിടിച്ചത് ലോറിയുടെ മുകൾഭാഗം വൈദ്യുതി ലൈനിൽ തട്ടിയാണെന്ന് സംശയിക്കുന്നുവെന്ന് ഡ്രൈവറുടെ മൊഴി. എന്നാൽ, കണ്ടെയ്നറിന്റെ ഉള്ളിൽനിന്നാണ് തീയും പുകയും വന്നതെന്നാണ് ദൃക്സാക്ഷികളുടെ മൊഴി. ഇരുചക്രവാഹനങ്ങളുടെ ബാറ്ററി ബന്ധം വിഛേദിക്കാതെ കയറ്റിയതു തീപിടിത്തത്തിനു കാരണമായോ എന്നും പരിശോധിക്കും. കണ്ടെയ്നറിന്റെ അകത്തുണ്ടായിരുന്ന പഴയ ഇരുചക്രവാഹനങ്ങളും ഗൃഹോപകരണങ്ങളും പൂർണമായി കത്തിനശിച്ചു. മുട്ടത്തെ അഗർവാൾ പാക്കേഴ്സ് ആൻഡ് മൂവേഴ്‌സ് പാഴ്സൽ സർവീസ് ഗോഡൗണിൽ നിന്നു ബെംഗളൂരുവിലേക്കു പുറപ്പെട്ട കണ്ടെയ്നർ ലോറിക്കാണ് വ്യാഴം വൈകിട്ടു 4.30നു തീപിടിച്ചത്. […]