കൊച്ചി: മാസപ്പടി ഇടപാടുമായി ബന്ധപ്പെട്ട് എൻഫോഴ്‌സ്‌മെന്റ് ഡയറക്ടറേറ്റ് (ഇഡി) നൽകിയ റിപ്പോർട്ടിന്റെ അടിസ്ഥാനത്തിൽ മുൻ മുഖ്യമന്ത്രി പിണറായി വിജയൻ, ടി. വീണ, പി.എ. മുഹമ്മദ് റിയാസ് എന്നിവർക്കെതിരെ എഫ്‌ഐആർ (FIR) രജിസ്റ്റർ ചെയ്യാത്തതിനെതിരെയുള്ള ഹർജി ഹൈക്കോടതി വിധി പറയാനായി മാറ്റി. ജസ്റ്റിസ് എ. ബദറുദ്ദീൻ ആണ് ഹർജി പരിഗണിച്ചത്.
ഇഡി നൽകിയ വിവരങ്ങളുടെ അടിസ്ഥാനത്തിൽ പ്രാഥമിക അന്വേഷണം മതിയോ അതോ ഉടൻ എഫ്‌ഐആർ രജിസ്റ്റർ ചെയ്ത് അന്വേഷണം നടത്താൻ നിയമപരമായ ബാധ്യതയുണ്ടോ എന്ന പ്രധാന നിയമപ്രശ്‌നമാണ് കോടതി പരിശോധിച്ചത്. ഇഡി റിപ്പോർട്ടിന്റെ അടിസ്ഥാനത്തിൽ അഴിമതി നിരോധന നിയമപ്രകാരം എഫ്‌ഐആർ രജിസ്റ്റർ ചെയ്യണമെന്നാണ് ഇഡിയും ഹർജിക്കാരനായ കെ.എം. ഷാജഹാനും വാദിച്ചത്. എന്നാൽ പ്രാഥമികാന്വേഷണത്തിന് സർക്കാരിന്/അന്വേഷണ ഏജൻസിക്ക് വിവേചനാധികാരമുണ്ടെന്ന നിലപാടാണ് സർക്കാരും എതിർഭാഗവും സ്വീകരിച്ചത്. ഇരുവിഭാഗത്തിന്റെയും വിശദമായ വാദങ്ങൾ കേട്ട ശേഷമാണ് കോടതി കേസ് വിധി പറയാനായി മാറ്റിയത്.
