ന്യൂഡൽഹി: യാത്രക്കിടെ എയർ ഇന്ത്യ വിമാനം കടുത്ത ആകാശച്ചുഴിയിൽപ്പെട്ട അപകടത്തിന്റെ പ്രാഥമിക മെയിന്റനൻസ് അന്വേഷണ റിപ്പോർട്ട് പുറത്തുവന്നു. യാത്രയ്ക്കിടെ കനത്ത കുലുക്കമുണ്ടായ നിമിഷങ്ങളിൽ വിമാനത്തിന്റെ ഓട്ടോപൈലറ്റ് സംവിധാനം സ്വയം വിച്ഛേദിക്കപ്പെട്ടു എന്ന് റിപ്പോർട്ടിൽ വ്യക്തമാക്കുന്നു.
ആകാശച്ചുഴിയുടെ ശക്തമായ ആഘാതത്തിൽ വിമാനത്തിന് പെട്ടെന്ന് നിയന്ത്രണം നഷ്ടപ്പെടുകയും താഴ്ചയിലേക്ക് പതിക്കുകയുമായിരുന്നു. ഈ സമയത്താണ് സുരക്ഷാ മുൻകരുതലിന്റെ ഭാഗമായി ഓട്ടോപൈലറ്റ് വിച്ഛേദിക്കപ്പെട്ടതെന്നാണ് പ്രാഥമിക നിഗമനം. സംഭവത്തിൽ വിമാനത്തിലെ യാത്രക്കാർക്കും ജീവനക്കാർക്കും പരിക്കേറ്റിരുന്നു. വിമാനത്തിന്റെ സാങ്കേതിക തകരാറുകളും സുരക്ഷാ മാനദണ്ഡങ്ങളും മുൻനിർത്തി കൂടുതൽ വിശദമായ അന്വേഷണ റിപ്പോർട്ട് ഉടൻ തന്നെ വ്യോമയാന ഡയറക്ടറേറ്റിന് സമർപ്പിക്കും.
