പനമ്പിള്ളി നഗറിലെ ‘സമാന്തര അധികാരകേന്ദ്രം’ മുതൽ കോടികളുടെ ഇടപാടുകൾ വരെ പോലീസ് പരിശോധിച്ചേക്കും
കൊച്ചി: അധികാരത്തിന്റെ തണലിൽ ഒരിക്കൽ വേട്ടയാടപ്പെട്ടുവെന്ന് ആരോപിക്കപ്പെട്ട പോലീസ് ഉദ്യോഗസ്ഥൻ ഇന്ന് അതേ സംവിധാനത്തിന്റെ തലപ്പത്ത്. എലത്തൂർ ട്രെയിൻ ആക്രമണക്കേസുമായി ബന്ധപ്പെട്ട് നടപടി നേരിട്ട ഐപിഎസ് ഉദ്യോഗസ്ഥൻ പി. വിജയൻ ഇന്ന് ക്രമസമാധാന ചുമതലയുള്ള എഡിജിപി. അതേസമയം, മുൻ മുഖ്യമന്ത്രി പിണറായി വിജയന്റെ പൊളിറ്റിക്കൽ സെക്രട്ടറിയായിരുന്ന പി. ശശിക്കെതിരെ ഉയർന്ന ഗുരുതര പരാതിയിൽ കൊച്ചി പോലീസ് അന്വേഷണം ശക്തമാക്കുകയാണ്.
ചെന്നൈ വ്യവസായി മുഹമ്മദ് ഷർഷാദ് നൽകിയ പരാതിയാണ് പുതിയ രാഷ്ട്രീയ ചർച്ചകൾക്ക് വഴിവെച്ചിരിക്കുന്നത്. പരാതിയിൽ ഉന്നയിച്ച ആരോപണങ്ങളുടെ അടിസ്ഥാനത്തിൽ പരാതിക്കാരനെ വിളിച്ചുവരുത്തി അന്വേഷണ സംഘം മൊഴിയെടുത്തതായാണ് വിവരം. സാമ്പത്തിക ഇടപാടുകൾ, അധികാര ദുർവിനിയോഗം, കേസുകളിൽ ഇടപെടൽ തുടങ്ങിയ ആരോപണങ്ങളാണ് പരാതിയിൽ ഉയരുന്നത്.
പി. ശശിക്കും
പുറമെ മുൻ സിപിഎം സംസ്ഥാന സെക്രട്ടറിയുടെ മകനും യുകെ കേന്ദ്രീകരിച്ച് പ്രവർത്തിക്കുന്ന പ്രവാസി വ്യവസായിയും ഉൾപ്പെട്ട സംഘം തനിക്കെതിരെ പ്രവർത്തിച്ചെന്നാണ് ഷർഷാദിന്റെ ആരോപണം. ഭരണസ്വാധീനം ഉപയോഗിച്ച് കള്ളക്കേസുകളിൽ കുടുക്കിയെന്നും കോടികളുടെ വിദേശ സാമ്പത്തിക ഇടപാടുകൾ നടന്നുവെന്നും പരാതിയിൽ ആരോപിക്കുന്നുണ്ട്.
പനമ്പിള്ളി നഗറിലെ ‘കേന്ദ്രം ’
കൊച്ചി പനമ്പിള്ളി നഗറിലെ സ്വകാര്യ ഓഫീസ് കേന്ദ്രീകരിച്ച് അധികാര ഇടപെടലുകളും സാമ്പത്തിക ഇടപാടുകളും നടന്നുവെന്ന ആരോപണമാണ് അന്വേഷണത്തിന്റെ പ്രധാന ഭാഗങ്ങളിലൊന്ന്.
പോലീസ് ഉദ്യോഗസ്ഥരുടെ സ്ഥലംമാറ്റം മുതൽ പ്രധാന കേസുകളിലെ അന്വേഷണങ്ങൾ വരെ ഈ കേന്ദ്രത്തിൽ നിന്ന് നിയന്ത്രിച്ചിരുന്നുവെന്ന ആരോപണവും പരാതിയിലുണ്ട്. ഇതുമായി ബന്ധപ്പെട്ട സാമ്പത്തിക ഇടപാടുകളുടെയും മറ്റ് രേഖകളുടെയും വിവരങ്ങൾ പോലീസ് ശേഖരിക്കുന്നതായാണ് സൂചന.
പരാതിക്കാരന്റെ മൊഴിയെടുപ്പ് പൂർത്തിയായ സാഹചര്യത്തിൽ, ആരോപണങ്ങൾക്ക് തെളിവുണ്ടോ എന്നതാകും ഇനി അന്വേഷണത്തിന്റെ നിർണായക ഘട്ടം. ഫോൺ രേഖകൾ, ഡിജിറ്റൽ തെളിവുകൾ, സാമ്പത്തിക ഇടപാടുകളുടെ രേഖകൾ എന്നിവ പരിശോധിക്കണമെന്ന ആവശ്യവും ഉയർന്നിട്ടുണ്ട്.
‘ അന്ന് സസ്പെൻഡ് ചെയ്ത ഉദ്യോഗസ്ഥൻ ഇന്ന് അന്വേഷണം നയിക്കുമോ?’
എലത്തൂർ ട്രെയിൻ ആക്രമണക്കേസുമായി ബന്ധപ്പെട്ട് വിവരങ്ങൾ ചോർന്നുവെന്ന ആരോപണത്തെ തുടർന്ന് പി. വിജയൻ മുൻപ് സസ്പെൻഷൻ ഉൾപ്പെടെയുള്ള നടപടികൾ നേരിട്ടിരുന്നു. എന്നാൽ തനിക്കെതിരായ നടപടി അന്യായമായിരുന്നുവെന്ന നിലപാടാണ് അദ്ദേഹം പിന്നീട് സ്വീകരിച്ചത്.
അന്ന് അധികാരകേന്ദ്രങ്ങളുടെ ഇടപെടലിനെ തുടർന്ന് താൻ ഒതുക്കപ്പെട്ടുവെന്ന രാഷ്ട്രീയ ആരോപണങ്ങളും ഉയർന്നിരുന്നു. ഇന്ന് സാഹചര്യം മാറിയിരിക്കുന്നു. പി. വിജയൻ പോലീസിലെ നിർണായക ചുമതലയിലുള്ള എഡിജിപിയാണ്.
അതുകൊണ്ടുതന്നെ പി. ശശിക്കെതിരായ പരാതിയിലെ അന്വേഷണം പുതിയ രാഷ്ട്രീയ കൗതുകത്തിനും വഴിയൊരുക്കുകയാണ്.
അന്ന് നടപടിക്ക് വിധേയനായ ഉദ്യോഗസ്ഥൻ ഇന്ന് അന്വേഷണ സംവിധാനത്തിന്റെ നിർണായക സ്ഥാനത്ത്. അന്ന് അധികാരത്തിന്റെ കേന്ദ്രത്തിൽ നിന്നിരുന്ന വ്യക്തിക്കെതിരെ ഇന്ന് അതേ പോലീസിൽ പരാതി.
പരാതിയിലെ ആരോപണങ്ങൾ തെളിയുമോ, അന്വേഷണം എഫ്ഐആറിലേക്കും തുടർനടപടികളിലേക്കും നീങ്ങുമോ എന്നതാണ് ഇനി അറിയേണ്ടത്. ആരോപണങ്ങൾ ശരിയാണെന്ന് തെളിയിക്കപ്പെടുന്നതുവരെ ബന്ധപ്പെട്ടവരെ കുറ്റക്കാരായി കാണാനാകില്ലെങ്കിലും, ഉയർന്നിരിക്കുന്ന ആരോപണങ്ങളുടെ ഗൗരവം കണക്കിലെടുത്ത് അന്വേഷണം രാഷ്ട്രീയ കേരളം ഉറ്റുനോക്കുകയാണ്.
കാലം മാറുമ്പോൾ അധികാരത്തിന്റെ കസേരകളും മാറും. ഒരിക്കൽ വേട്ടയാടപ്പെട്ടവന്റെ കൈകളിലേക്ക് തന്നെ അന്വേഷണത്തിന്റെ ചുമതല എത്തുമ്പോൾ, പഴയ അധികാരകഥകൾക്ക് പുതിയൊരു അധ്യായം തുറക്കുകയാണ്.
