തിരുവനന്തപുരം: വിഘ്നങ്ങളും തടസ്സങ്ങളും അകറ്റി ഐശ്വര്യവും സമൃദ്ധിയും കൈവരിക്കാൻ രാജ്യത്തുടനീളം ഇന്ന് വിനായക ചതുർത്ഥി ആഘോഷിക്കുന്നു. ഗണേശ ഭഗവാന്റെ ജന്മദിനമായിട്ടാണ് ഹൈന്ദവ വിശ്വാസികൾ വിനായക ചതുർത്ഥി ആചരിക്കുന്നത്.
ചിങ്ങമാസത്തിലെ വെളുത്തപക്ഷ ചതുർത്ഥി തിഥിയിലാണ് ഈ വിശേഷപ്പെട്ട ദിവസം വരുന്നത്. ഭവനങ്ങളിലും പ്രത്യേക പൂജാകേന്ദ്രങ്ങളിലും ഗണപതി വിഗ്രഹങ്ങൾ പ്രതിഷ്ഠിച്ച് ഭക്തിപൂർവ്വം വിശ്വാസികൾ ആരാധന നടത്തുന്നു. കൊട്ടാരക്കര മഹാഗണപതി ക്ഷേത്രം, പഴവങ്ങാടി ശ്രീ മഹാഗണപതി ക്ഷേത്രം, മധൂർ തുടങ്ങിയ പ്രമുഖ ഗണപതി ക്ഷേത്രങ്ങളിൽ വിനായക ചതുർത്ഥിയോടനുബന്ധിച്ച് പ്രത്യേക പൂജകളും വഴിപാടുകളും നടക്കുന്നുണ്ട്.
മധുരപലഹാരമായ മോദകവും കടുംപായസവും ഗണപതി ഭഗവാന് നിവേദിച്ചും, കറുകമാല സമർപ്പിച്ചുമാണ് വിശ്വാസികൾ പ്രാർത്ഥനകളിൽ പങ്കുചേരുന്നത്. സർവ്വവിഘ്നങ്ങളും നീക്കി നന്മകളും ഐശ്വര്യവും വർഷിക്കട്ടെയെന്ന പ്രാർത്ഥനയോടെ നാടെങ്ങും ഗണേശോത്സവ ചടങ്ങുകൾക്ക് തുടക്കമായി.
