തിരുവനന്തപുരം: വർഷങ്ങളായി നിലനിന്ന റെക്കോർഡിനെ മറികടന്ന് ആതിര സോമരാജ്. 47-ാമത് കേരള പൊലീസ് അത്‌ലറ്റിക് ആൻഡ് ഗെയിംസിലെ വനിതാ ഹൈജമ്പിൽ കേരള ആംഡ് പൊലീസ് (KAP-5) താരം ആതിര സോമരാജ് 1.70 മീറ്റർ ഉയരം കീഴടക്കി സ്വർണത്തിനൊപ്പം പുതിയ റെക്കോർഡും സ്വന്തമാക്കി.
2011ൽ KAP-1ന്റെ ടിന്റു എൻ. ഡി. സ്ഥാപിച്ച 1.66 മീറ്റർ റെക്കോർഡാണ് ആതിരയുടെ 1.70 മീറ്റർ ചാട്ടത്തോടെ പഴങ്കഥയായത്. 15 വർഷമായി നിലനിന്ന റെക്കോർഡ് 4 സെന്റിമീറ്റർ മെച്ചപ്പെടുത്തിയാണ് ആതിര പുതിയ ഉയരം കുറിച്ചത്.
മത്സരവേദിയിൽ നിർണായകമായ ഉയരങ്ങൾ ഓരോന്നായി മറികടന്ന ആതിര, 1.70 മീറ്ററിൽ എത്തിയപ്പോൾ റെക്കോർഡ് സ്വന്തം പേരിലാക്കുകയായിരുന്നു. സ്വർണനേട്ടത്തേക്കാൾ തിളക്കമേറിയത് വർഷങ്ങളായി നിലനിന്ന റെക്കോർഡ് തിരുത്തിയ പ്രകടനമായിരുന്നു.
KAWPBN (കേരള ആംഡ് വിമൻ പൊലീസ് ബറ്റാലിയൻ) താരങ്ങളാണ് രണ്ടും മൂന്നും സ്ഥാനങ്ങളിൽ എത്തിയത്. ദേവിക ശങ്കരൻ 1.23 മീറ്റർ മറികടന്ന് വെള്ളിയും മുഹമ്മദ് സോണി കെ. 1.20 മീറ്ററിൽ വെങ്കലവും നേടി.