ഡെറാഡൂൺ: ഗതാഗതത്തിനായി തുറന്നുകൊടുത്ത് വെറും 17 ദിവസങ്ങൾക്കകം ഉത്തരാഖണ്ഡിലെ ഡെറാഡൂണിൽ പാലം തകർന്നു വീണു. നന്ദകി ചൗക്കിയിലുള്ള (Nandaki Chowki) പാലമാണ് ചൊവ്വാഴ്ച പുലർച്ചെയോടെ തകർന്നുവീണത്. ഏകദേശം 16 കോടി രൂപ ചെലവഴിച്ചു നിർമ്മിച്ച പാലമാണ് ഉദ്ഘാടനം കഴിഞ്ഞ് ഏതാനും ദിവസങ്ങൾക്കുള്ളിൽ പൂർണ്ണമായി തകർന്നത്.
അപകടസമയത്ത് പാലത്തിന് മുകളിലൂടെ വാഹനങ്ങൾ കടന്നുപോകാതിരുന്നതിനാൽ വലിയൊരു ദുരന്തമാണ് ഒഴിവായത്. എങ്കിലും സംഭവത്തിന് പിന്നാലെ വൻ പ്രതിഷേധമാണ് പ്രദേശത്ത് ഉയർന്നിരിക്കുന്നത്.
തുടർച്ചയായ മഴയും മലയോര മേഖലകളിലെ മോശം നിർമ്മാണങ്ങളും കാരണം അടുത്തിടെയായി നിരവധി അടിസ്ഥാന സൗകര്യ പദ്ധതികളാണ് ഉത്തരാഖണ്ഡിൽ തകർന്നുവീഴുന്നത്. ഇത് പൊതുജനങ്ങളുടെ ഇടയിൽ സർക്കാരിനെതിരെ വലിയ അമർഷത്തിന് കാരണമായിട്ടുണ്ട്.
