തിരുവനന്തപുരം: തലസ്ഥാനത്തെ കുപ്രസിദ്ധ ഗുണ്ടയായ ‘ജംബുലിഗം’ സുരേഷിനെ പൊലീസ് പിടികൂടി. ബാലരാമപുരത്ത് വെച്ചാണ് പ്രതിയെ പ്രത്യേക അന്വേഷണ സംഘം പിടികൂടിയത്. വിവിധ സ്റ്റേഷനുകളിലായി 80-ഓളം ക്രിമിനൽ കേസുകളിൽ പ്രതിയാണ് ഇയാൾ.
കഴിഞ്ഞ പത്ത് വർഷത്തോളമായി പൊലീസിന്റെ കണ്ണുവെട്ടിച്ച് ഒളിവിൽ കഴിഞ്ഞുവരികയായിരുന്നു സുരേഷ്. നീണ്ട നാളത്തെ രഹസ്യന്വേഷണത്തിനും നിരീക്ഷണത്തിനുമൊടുവിലാണ് ഒടുവിൽ ഇയാൾ പിടിയിലാകുന്നത്. തലസ്ഥാന നഗരിയിലും സമീപ പ്രദേശങ്ങളിലും നിരവധി അക്രമ സംഭവങ്ങളിലും ക്രിമിനൽ കേസുകളിലും പ്രതിയായ സുരേഷിന്റെ അറസ്റ്റ് പൊലീസിന് വലിയൊരു നേട്ടമായാണ് വിലയിരുത്തപ്പെടുന്നത്. പ്രതിയെക്കുറിച്ചുള്ള കൂടുതൽ ചോദ്യം ചെയ്യലുകൾക്കും തുടർനടപടികൾക്കും ശേഷം കോടതിയിൽ ഹാജരാക്കും.
