കൊൽക്കത്ത: ഡ്രൈവിംഗ് പരിശീലനത്തിനിടെ നിയന്ത്രണം വിട്ട കാർ കുളത്തിലേക്ക് മറിഞ്ഞ് 42-കാരിക്ക് ദാരുണാന്ത്യം. കൊല്ക്കത്തയിലെ കെസ്റ്റോപുരിലുള്ള പ്രഫുല്ല കനൻ (വെസ്റ്റ്) മേഖലയിലാണ് നാടിനെ നടുക്കിയ ഈ ദാരുണമായ സംഭവം ഉണ്ടായത്. വാഹനം പൂർണ്ണമായും വെള്ളത്തിൽ മുങ്ങിപ്പോയതിനെ തുടർന്നാണ് മരണം സംഭവിച്ചത്.
ഡ്രൈവിംഗ് പഠിക്കുന്നതിനിടെ അബദ്ധത്തിൽ കാറിന്റെ നിയന്ത്രണം നഷ്ടപ്പെടുകയും അതിവേഗത്തിൽ സമീപത്തെ കുളത്തിലേക്ക് മറിഞ്ഞ് വീഴുകയുമായിരുന്നു എന്നാണ് പോലീസിന്റെ പ്രാഥമിക നിഗമനം. അപകടം നടന്നയുടൻ തന്നെ വിവരമറിഞ്ഞ് നാട്ടുകാരും പോലീസും ഫയർഫോഴ്സും സ്ഥലത്തെത്തി അടിയന്തര രക്ഷാപ്രവർത്തനം നടത്തിയെങ്കിലും യുവതിയുടെ ജീവൻ രക്ഷിക്കാനായില്ല.
ഏറെ നേരത്തെ പരിശ്രമത്തിനൊടുവിലാണ് വെള്ളത്തിൽ മുങ്ങിയ വാഹനം കരയ്ക്കെത്തിക്കാനായത്. മൃതദേഹം പോസ്റ്റ്മോർട്ടത്തിനായി ആശുപത്രിയിലേക്ക് മാറ്റി. സംഭവത്തിൽ പോലീസ് കേസെടുത്ത് വിശദമായ അന്വേഷണം ആരംഭിച്ചിട്ടുണ്ട്. പരിശീലനം നൽകിയ ആളുടെ ഭാഗത്തുനിന്ന് വീഴ്ചകൾ ഉണ്ടായിട്ടുണ്ടോ എന്ന കാര്യവും പോലീസ് പരിശോധിച്ചുവരികയാണ്.
