കടത്തനാട് ലേബർ സൊസൈറ്റിയിലെ നിക്ഷേപകനായിരുന്ന ഇബ്രാഹിം ഹാജി ജീവനൊടുക്കിയ സംഭവത്തിൽ, സൊസൈറ്റി ഭാരവാഹികൾക്കെതിരെ കേസെടുക്കണമെന്ന് ആവശ്യപ്പെട്ട് കുടുംബം രംഗത്തെത്തി. സംഭവത്തിൽ സമഗ്രമായ അന്വേഷണം നടക്കണമെന്നും കുറ്റക്കാർക്കെതിരെ ശക്തമായ നിയമനടപടി സ്വീകരിക്കണമെന്നും ആവശ്യപ്പെട്ട് ഇബ്രാഹിം ഹാജിയുടെ കുടുംബം റൂറൽ എസ്.പിക്ക് പരാതി നൽകി.
സൊസൈറ്റിയിൽ ഇട്ട പണം സമയത്ത് തിരികെ കിട്ടാത്തതിനാൽ ഉണ്ടായ വലിയ സാമ്പത്തിക പ്രയാസവും വിഷമവുമാണ് ഇബ്രാഹിം ഹാജിയെ ഇതിലേക്ക് നയിച്ചതെന്നാണ് ബന്ധുക്കൾ പറയുന്നത്. പലതവണ ചോദിച്ചിട്ടും പണം തിരികെ നൽകാൻ ഭാരവാഹികൾ തയ്യാറായില്ലെന്നും കുടുംബത്തിന്റെ പരാതിയിൽ പറയുന്നു.
നിക്ഷേപകരുടെ പണം തട്ടിയെടുക്കാനും സാമ്പത്തിക ക്രമക്കേട് നടത്താനും കൂട്ടുനിന്ന ഭാരവാഹികൾക്കെതിരെ ആത്മഹത്യാ പ്രേരണക്കുറ്റം ചുമത്തി കേസെടുക്കണമെന്നാണ് കുടുംബത്തിന്റെ പ്രധാന ആവശ്യം. വിഷയത്തിൽ പോലീസും സഹകരണ വകുപ്പും അടിയന്തരമായി ഇടപെടണമെന്നും കുടുംബം ആവശ്യപ്പെട്ടു.
