തമിഴ്നാട് മുഖ്യമന്ത്രി വിജയിയെക്കുറിച്ച് നടത്തിയ അപകീർത്തികരമായ പരാമർശങ്ങളുടെ പേരിൽ ഡി.എം.കെ നേതാവും പ്രതിപക്ഷ നേതാവുമായ ഉദയനിധി സ്റ്റാലിൻ അറസ്റ്റിലായിരുന്നു. തമിഴക വെട്രി കഴകത്തിന്റെ (ടി.വി.കെ) നേതൃത്വത്തിലുള്ള സർക്കാരും ഡി.എം.കെയും തമ്മിലുള്ള രാഷ്ട്രീയ പോരിനാണ് ഇത് വഴിവെച്ചിരിക്കുന്നത്.
ബജറ്റ് സമ്മേളനത്തിന് തലേന്നാണ് വിജയ്യുടെ നേതൃത്വത്തിലുള്ള ടി.വി.കെ സർക്കാരും ഡി.എം.കെയും തമ്മിൽ വലിയ വാക്പോരിനും മദ്രാസ് ഹൈക്കോടതിയിലെ നിയമപോരാട്ടത്തിനും ഇത് കാരണമായത്. സംസ്ഥാനത്തുടനീളം വലിയ പ്രതിഷേധങ്ങളും ഇതിനെ തുടർന്നുണ്ടായി.
ഉദയനിധിയെ കസ്റ്റഡിയിലെടുത്ത് തഞ്ചാവൂരിലേക്ക് കൊണ്ടുപോയ പൊലീസ്, ഹൈക്കോടതി ഉത്തരവിനെ തുടർന്ന് സെങ്കിപ്പെട്ടി പൊലീസ് സ്റ്റേഷനിൽ വെച്ച് ചോദ്യം ചെയ്യുകയും പിന്നീട് സ്റ്റേഷൻ ജാമ്യത്തിൽ വിടുകയും ചെയ്തു.
ചെന്നൈ ഈസ്റ്റ് കോസ്റ്റ് റോഡിലെ ഉദയനിധിയുടെ വസതിയിൽ തഞ്ചാവൂർ, ചെന്നൈ നീലങ്കരൈ എന്നിവിടങ്ങളിൽ നിന്നുള്ള പൊലീസ് സംഘം എത്തിയിരുന്നു. വീടിന് ചുറ്റും വൻ സുരക്ഷയായിരുന്നു ഒരുക്കിയിരുന്നത്. മാധ്യമങ്ങളുടെ സാന്നിധ്യത്തിലാണ് ഉദയനിധിയെ പൊലീസ് വാഹനത്തിൽ കയറ്റി കൊണ്ടുപോയത്. വീട് വിടുന്നതിന് മുൻപ്, കാവേരി നദീജല തർക്കത്തിൽ നിന്ന് ശ്രദ്ധ തിരിക്കാൻ വിജയ് സർക്കാർ കരുതിക്കൂട്ടി ഉണ്ടാക്കിയ വിവാദമാണിതെന്ന് പ്രതിപക്ഷ നേതാവ് ആരോപിച്ചു.
