ശ്രീഹരിക്കോട്ടയിലെ സതീഷ് ധവാൻ സ്പേസ് സെന്ററിൽ നിന്ന് ഐഎസ്ആർഒയുടെ അത്യാധുനിക ഭൗമനിരീക്ഷണ ഉപഗ്രഹമായ ഇഒഎസ്-05 വിജയകരമായി വിക്ഷേപിച്ചു.
വെള്ളിയാഴ്ച പുലർച്ചെ കൃത്യം 2.55നാണ് ഇഒഎസ്-05നെയും വഹിച്ച് ജിഎസ്എൽവി-എഫ്17 റോക്കറ്റ് രണ്ടാം വിക്ഷേപണത്തറയിൽ നിന്ന് കുതിച്ചുയർന്നത്. ബുധനാഴ്ച രാത്രി 11.30ന് ആരംഭിച്ച 27 മണിക്കൂർ നീണ്ട കൗണ്ട്ഡൗണിന് ശേഷമായിരുന്നു വിക്ഷേപണം.
കൃഷി, ദുരന്തനിവാരണം തുടങ്ങിയ നിർണായക മേഖലകൾക്ക് തത്സമയ ഭൗമചിത്രങ്ങൾ ലഭ്യമാക്കുക എന്നതാണ് ഉപഗ്രഹത്തിന്റെ പ്രധാന ലക്ഷ്യം. 2367 കിലോഗ്രാം ഭാരമുള്ള പേലോഡുമായി കുതിച്ചുയർന്ന റോക്കറ്റ് ഉപഗ്രഹത്തെ സബ്-ജിയോസിൻക്രണസ് ട്രാൻസ്ഫർ ഓർബിറ്റിൽ എത്തിച്ചു.
ജിയോസിൻക്രണസ് ഭ്രമണപഥത്തിലെത്തുന്ന രാജ്യത്തെ ആദ്യ ഇമേജിങ് ഉപഗ്രഹമെന്ന നേട്ടവും ഇഒഎസ്-05 സ്വന്തമാക്കിയതായി ഐഎസ്ആർഒ അറിയിച്ചു.
മഴയും പ്രതികൂല കാലാവസ്ഥയും വകവെക്കാതെ വിക്ഷേപണം നേരിൽ കാണാൻ നിരവധിപേരാണ് ശ്രീഹരിക്കോട്ടയിലെത്തിയത്.
ഇന്ത്യയുടെ ബഹിരാകാശ കുതിപ്പിന് മറ്റൊരു ചരിത്ര നിമിഷം! 🇮🇳🚀
