ന്യൂഡൽഹി: ‘ലുങ്കിവാല’ പരാമർശവുമായി ബന്ധപ്പെട്ട് രാജ്യസഭയിലുണ്ടായ വിവാദങ്ങൾക്ക് പിന്നാലെ സിപിഎം എംപി ജോൺ ബ്രിട്ടാസിനെതിരെ മറുപടിയായി അവകാശലംഘന നോട്ടീസ് നൽകി ബിജെപി എംപി സുഷ്മിത ദേവ്. സഭയിൽ തനിക്കെതിരെ മോശം പരാമർശങ്ങൾ നടത്തിയെന്ന് ചൂണ്ടിക്കാട്ടിയാണ് സുഷ്മിത ദേവ് രാജ്യസഭാ അധ്യക്ഷന് നോട്ടീസ് നൽകിയത്.
സഭയിൽ സംസാരിക്കുന്നതിനിടെ സുഷ്മിത ദേവ് തന്നെ ‘ലുങ്കിവാല’ എന്ന് വിളിച്ച് അധിക്ഷേപിച്ചു എന്ന് ആരോപിച്ച് ജോൺ ബ്രിട്ടാസ് നേരത്തെ അവർക്കെതിരെ അവകാശലംഘന നോട്ടീസ് നൽകിയിരുന്നു. ദക്ഷിണേന്ത്യൻ വസ്ത്രധാരണത്തെയും മലയാളികളെയും അപമാനിക്കുന്നതാണ് ഈ പരാമർശമെന്ന് ചൂണ്ടിക്കാട്ടി പ്രതിപക്ഷം ഒന്നടങ്കം സഭയിൽ പ്രതിഷേധിക്കുകയും ചെയ്തിരുന്നു. ഇതിന് പിന്നാലെയാണ് സുഷ്മിത ദേവ് ബ്രിട്ടാസിനെതിരെ പ്രത്യാക്രമണവുമായി രംഗത്തെത്തിയത്.
എന്നാൽ താൻ ആരുടേയും വസ്ത്രധാരണത്തെയോ ഏതെങ്കിലും സംസ്ഥാനത്തെയോ അപമാനിച്ചിട്ടില്ലെന്നാണ് സുഷ്മിത ദേവ് സഭയിൽ വ്യക്തമാക്കിയത്. മറിച്ച് ബ്രിട്ടാസിന്റെ ചില പരാമർശങ്ങൾ സഭയുടെ അന്തസ്സിന് നിരക്കാത്തതാണെന്നും അവർ ആരോപിച്ചു. സഭയിൽ ഭരണ-പ്രതിപക്ഷ ബഹളത്തിന് കാരണമായ ഈ വിവാദം കടുത്തതോടെ രാജ്യസഭാ അധ്യക്ഷൻ സി.പി. രാധാകൃഷ്ണൻ ഇരു എംപിമാരെയും തന്റെ ചേംബറിലേക്ക് വിളിപ്പിച്ച് സംസാരിക്കുകയും സഭയുടെ അന്തസ്സ് കാത്തുസൂക്ഷിക്കാൻ കർശന നിർദ്ദേശം നൽകുകയും ചെയ്തു
